អន្តរជាតិ៖ទីភ្នាក់ងារសិទ្ធិមនុស្សរបស់អង្គការសហប្រជាជាតិ បាននិយាយថា គិតត្រឹមថ្ងៃអង្គារសប្ដាហ៍នេះមានជនស៊ីវិលយ៉ាងហោចណាស់ចំនួន 1,563 នាក់ រួមទាំងកុមារចំនួន130នាក់ផងដែរត្រូវបានសម្លាប់នៅក្នុងប្រទេសអ៊ុយក្រែនចាប់តាំងពីការឈ្លានពានរបស់រុស្ស៊ីកាលពីថ្ងៃទី24 ខែកុម្ភៈ។
ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស(OHCHR)បាននិយាយថាអ្នកស្លាប់1,076នាក់ ត្រូវបានរាយការណ៍នៅក្នុងតំបន់ដែលរួមមានទីក្រុង Kyiv, Kharkiv, Chernihiv និង Kherson។ ចំណែកឯអ្នកស្លាប់ 487នាក់ផ្សេងទៀត ត្រូវបានគេបញ្ជាក់នៅភាគខាងកើតនៃតំបន់Donetsk និង Luhansk ។
ការិយាល័យOHCHRបានរាយការណ៍ថាក្រៅពីមានអ្នកស្លាប់1,563នាក់នោះក៏មានជនស៊ីវិល២,២១៣នាក់ផ្សេងទៀតបានរងរបួសផងដែរ។ទីភ្នាក់ងារអង្គការសហប្រជាជាតិបានទទួលស្គាល់ថាតួលេខជាក់ស្តែងគឺខ្ពស់ជាងតួរលេខនៅក្នុងរបាយការណ៍។ ជាការពិតណាស់ការប៉ាន់ស្មានគិតត្រឹមថ្ងៃអង្គារសប្ដាហ៍នេះគឺមិនរាប់បញ្ចូលករណីស្លាប់និងរបួសនៅក្នុងទីក្រុង Mariupol និងតំបន់ផ្សេងទៀតដែលស្ថិតនៅក្រោមការវាយប្រហារយ៉ាងខ្លាំងក្លាពីកងកម្លាំងរុស្ស៊ីនោះទេ។
ទន្ទឹមនឹងនេះ ការិយាល័យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន(UNHCR)បាននិយាយថា មនុស្សជាង 4.27 លាននាក់បានភៀសខ្លួនចេញពីប្រទេសអ៊ុយក្រែនគិតត្រឹមថ្ងៃអង្គារ។UNHCRនិយាយថាមនុស្សប្រហែល2.49 លាននាក់បានឆ្លងដែនចូលទៅក្នុងប្រទេសប៉ូឡូញ។ រូម៉ានីបានទទួលជនភៀសខ្លួនអ៊ុយក្រែនប្រមាណ 65 ម៉ឺននាក់ ខណៈប្រទេសម៉ុលដាវី និងហុងគ្រីមានជនភៀសខ្លួនអ៊ុយក្រែនប្រហែល39ម៉ឺននាក់។
ទីភ្នាក់ងារនេះនិយាយថាជនភៀសខ្លួនប្រមាណ35ម៉ឺននាក់បានឆ្លងព្រំដែនចូលទៅក្នុងប្រទេសរុស្ស៊ីគិតត្រឹមថ្ងៃទី29ខែមីនា៕
