លោក Pep Guardiola ត្រូវបានសហព័ន្ធបាល់ទាត់ប្រទេសប្រេស៊ីលទាក់ទងឲ្យទៅដឹកនាំ ដោយហ៊ានឲ្យថ្លៃឈ្នួល១០លានផោនក្នុងមួយឆ្នាំ។
បើយោងតាមទីភ្នាក់ងារMarca, ប្រេស៊ីលនឹងត្រូវប្រជែងជាមួយជម្រើសជាតិហុល្លង់ដែលកំពុងចង់បាន Guardiola ដូចគ្នា ពេលដែលលោកបញ្ចប់ការងារជាមួយ Manchester City។ កុងត្រារបស់អ្នកចាត់ការវ័យ៥១ឆ្នាំជាមួយ City នៅសល់រហូតដល់ឆ្នាំ២០២៣ ហើយគម្រោងនៅពេលខាងមុខលោកចង់ទៅដឹកនាំក្រុមជម្រើសជាតិវិញម្ដង។
ប្រេស៊ីលគឺជាក្រុមជម្រើសជាតិមួយដែលលោក Guardiola ធ្លាប់បង្ហាញការចាប់អារម្មណ៍។ដោយឡែកគ្រូបច្ចុប្បន្នរបស់ប្រេស៊ីលលោក Tite បានប្រកាសរួចមកហើយថា លោកនឹងលាលែងចេញពីតំណែងពេលដែលបញ្ចប់ព្រឹត្តិការណ៍ World Cup ២០២២នៅប្រទេសកាតា។
ប្រេស៊ីលមើលឃើញលោកGuardiola ថាជាបេក្ខភាពដ៏សាកសមបំផុតក្នុងការជំនួសកៅអីរបស់លោកTiteហើយសង្ឃឹមថា អតីតអ្នកចាត់ការរបស់ Barcelonaរូបនេះអាចមកដឹកនាំក្រុមលេងក្នុងព្រឹត្តិការណ៍ Copa America ២០២៤ និង World Cup ២០២៦ ដែលនឹងរៀបចំនៅសហរដ្ឋអាមេរិក កាណាដា និងម៉ិកស៊ិក៕
