ភ្នំពេញ: រថយន្តMazda មួយគ្រឿងបោះពួយយ៉ាងលឿន បានជ្រុលទៅបុកឃឿនថ្មហោះឡើងលើសួនច្បារដាច់កង់ទៅមុខលេងរួច។
ហេតុការណ៍នេះកើតឡើងនៅវេលាម៉ោង១២នឹង៣០នាទីយប់រំលងអាធ្រាត្រឈានចូលថ្ងៃទី១១ ខែមេសា ឆ្នាំ២០២២ ស្ថិតនៅតាមបណ្តោយផ្លូវសហព័ន្ធរុស្ស៊ី ក្នុងសង្កាត់មិត្តភាព ខណ្ឌ៧មករា រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានអោយដឹងថាមុនពេលកើតហេតុមានបុរសម្នាក់រួមដំណើរជាមួយស្រ្តីបីនាក់បើកបររថយន្តមួយគ្រឿងម៉ាកMazda6ពណ៌ទឹកប្រាក់ ពាក់ស្លាកលេខកណ្តាល 2B-5999 ទិសដៅពីលិចទៅកើតក្នុងល្បឿនលឿនមិនប្រយ័ត្នបានរេចង្កូតបុកឃឿនថ្មសួនច្បារពុះចែកផ្លូវ បន្តហោះផ្លោងឡើងលើសួនច្បារបណ្តាលអោយរថយន្តដាច់កង់ស្តាំផ្នែកខាងមុខ សំណាងល្អមិនបណ្តាលអោយមានអ្នករងរបួស។ ភ្លាមៗបុរសអ្នកបើកបររួមទាំងស្ត្រីបីនាក់បានជិះកង់បីឥណ្ឌាចេញបាត់ស្រមោលដោយបន្សល់ទុករថយន្តនៅកន្លែងកើតហេតុ។
ក្រោយពេលកើតហេតុសមត្ថកិច្ចមូលដ្ឋានបានមកដល់រួចរាយការណ៍ជូនសមត្ថកិច្ចជំនាញផ្នែកចរាចរណ៍ធ្វើការវាស់វែងនិងស្ទួចយករថយន្តបង្កទៅរក្សាទុកការិយាល័យចរាចរណ៍រាជធានីភ្នំពេញរងចាំម្ចាស់រថយន្តចូលខ្លួនដោះស្រាយតាមនីតិវិធី៕
ដោយ រតនា
