បងប្អូនជាយុវជន យុវនារី និង ប្រជាពលរដ្ឋ ចំនួន៩៦០នាក់ មកពីក្រុមហ៊ុន ប្រ៊ីលាន ចំនួន ៥០០នាក់ និង រត់រឺម៉ក់ម៉ូតូកង់បី ផាស់ស្អាប់ ចំនួន៤៦០នាក់ក្នុងក្រុងសៀមរាប ត្រូវបានសុំចូលជាសមាជិកសមាជិកាគណបក្សប្រជាជនកម្ពុជា ត្រូវបានធ្វើពិធីប្រកាសបញ្ចូល កាលពី រសៀលថ្ងៃទី ១១ ខែ មេសា ឆ្នាំ២០២២ នៅទីស្នាក់ការគណៈកម្មាធិការគណបក្សប្រជាជនកម្ពុជាខេត្តសៀមរាប ក្រោម អធិបតីភាពរបស់ឯកឧត្តម ទៀ សីហា សមាជិកគណៈកម្មាធិការកណ្តាល និងជាប្រធានគណបក្សប្រជាជនកម្ពុជា ខេត្តសៀមរាប ដោយមានការចូលរួមពីសមាជិកគណៈកម្មាធិការគណបក្សប្រជាជនខេត្ត ឯកឧត្តមជាសមាជិកក្រុមការងារថ្នាក់កណ្តាលចុះជួយខេត្តសៀមរាប ។
បន្ទាប់ពីកិច្ចស្វាគមន៍របស់លោកប្រធានគណបក្សប្រជាជនក្រុងសៀមរាប និង ការអានសេចក្តីសម្រេចទទួលស្គាល់ របស់គណៈកម្មាធិការគណបក្សប្រជាជនខេត្ត ប្រកាសបញ្ចូល និង ប្រគល់សេចក្តីសម្រេចជូនដល់សមាជិកបក្សថ្មីទាំង ៩៦០នាក់ ព្រមទាំងតំណាងសមាជិកថ្មីឡើងធ្វើការប្តេជ្ញាចិត្តរួចមក ក្នុងនោះដែរឯកឧត្តម ទៀ សីហា ក៏បានអនុញ្ញាតឲ្យបងប្អូនដែលជាកម្មករមកពីក្រៅប្រទេស និង បងប្អូនប្រកបរបររត់ម៉ូតូរឺម៉ក់កង់បី និង ផាស់ស្អាប់ លើកពីទុក្ខលំបាក ក្នុងពេលជួបនូវវិបត្តិជម្ងឺកូវិដ១៩ ដែលត្រូវរដ្ឋបាលខេត្តធ្វើការបិទខ្ទប់ជាតំបន់ក្រហមកន្លងមក និង ធ្វើការងារជាកម្មករនៅក្រៅប្រទេស ព្រមទាំងភាពធូស្រាលក្នុងគ្រួសារនៅពេល ជម្ងឺកូវិដមានការធូស្រាល និង បងប្អូនបានលើកផងដែរពីការ ដោះស្រាយស្បៀងអាហាររបស់រដ្ឋបាលខេត្តសៀមរាប ចំពោះគ្រួសារជួបការលំបាកក្នុងវិបត្តិកូវិដផងដែរ ។
ម៉្យាងទៀត បងប្អូនបានមើលឃើញពីការដឹកនាំរបស់គណបក្សប្រជាជន ពីមួយថ្ងៃទៅមួយថ្ងៃមានការអភិវឌ្ឍរីកចម្រើនលើគ្រប់វិស័យ សំខាន់នូវសមិទ្ធិផលហេដ្ឋារចនាសម្ព័ន្ធផ្លូវថ្នល់ទាំង៣៨ខ្សែ ក្នុងខេត្តសៀមរាប និងការរៀបចំដងស្ទឹងប្រវត្តិសាស្ត្រ កាន់ តែមានភាពស្រស់ស្អាត ក្នុងការទទួលស្វាគមន៍ភ្ញៀវជាតិ អន្តរជាតិ និងធ្វើឲ្យជីវភាពរបស់ប្រជាពលរដ្ឋ មានភាពប្រសើរ ឡើងវិញជាបណ្តើរៗ ។ ឯកឧត្តម ទៀ សីហា ក៏បានធ្វើការបញ្ជាក់ថា ដោយការយល់ឃើញច្បាស់របស់បងប្អូន ដែលមានការជឿជាក់លើការដឹកនាំ ដ៏ត្រឹមត្រូវរបស់គណបក្សប្រជាជនកម្ពុជា ហើយបានធ្វើការសុំចូលជាសមាជិកគណបក្សប្រជាជនកម្ពុជានាពេលនេះ បានសបញ្ជាក់ឲ្យឃើញ នូវរាល់សកម្មភាព និង បានបង្ហាញឲ្យឃើញថា គណបក្សប្រជាជនកម្ពុជា កាន់តែមានប្រជាប្រីយ៍ភាព ឧត្តមភាព ធ្វើឲ្យគណបក្សប្រជាជន កាន់តែមានការទទួលគាំទ្រយ៉ាងខ្លាំងក្លា ពីស្រទាប់ប្រជាជន ក្នុងពេលបោះឆ្នោតជ្រើសរើសក្រុមប្រឹក្សាឃុំសង្កាត់ និង តំណាងរាស្ត្រនានៅពេលខាងមុខនេះ ។
ក្នុងនោះដែរឯកឧត្តមប្រធាន ក៏បានលើកឡើងពីភាពរីកចម្រើន នៃកិច្ចអភិវឌ្ឍន៍ប្រទេសជាតិ របស់គណបក្សប្រជាជន ក្នុងអាណត្តិទី៦ ក្រោមកិច្ចដឹកនាំរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ។ ឯកឧត្តមក៏បានធ្វើការគូសបញ្ជាក់ផងដែរថា ការសម្រេចចិត្តជ្រើសរើសរបស់បងប្អូន គឺជាភាពយុត្តិធម៌បំផុត សម្រាប់បងប្អូន ក្នុងការគាំទ្រនូវកម្មវិធីនយោបាយ និង លក្ខន្តិកៈគណបក្សប្រជាជនកម្ពុជា ដើមី្បរួមគ្នាធ្វើកិច្ចអភិវឌ្ឍន៍ជាតិ ឲ្យមានការរីកចម្រើន ដូចបណ្តាប្រទេសជឿនលឿនលើសកលលោក ។
ក្នុងនោះដែរឯកឧត្តម ទៀ សីហា ក៏បានលើកឡើងពីគោលការណ៍ទាំង១១ខ របស់គណបក្សប្រជាជន ព្រមទាំងធ្វើការបញ្ជាក់នូវចំណុចមួយចំនួន នៃលក្ខន្តិកៈរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ដែលជាកុលបុត្រខ្មែរដ៏ឆ្នើម រួមទាំងវីរៈជនមួយចំនួន ក្នុងការស្វែងរកនូវសុខសន្តិភាពពេញលេញ ជូនជាតិមាតុភូមិ ក្រោមគោលនយោបាយឈ្នះៗ និង ធ្វើឲ្យមានការអភិវឌ្ឍន៍រីកចម្រើនលើគ្រប់ វិស័យតាំងពីទីប្រជុំជនទៅដល់ជនបទ ។ ក្នុងនោះដែរឯកឧត្តមក៏បានធ្វើការផ្តាំផ្ញើដល់បងប្អូនជាសមាជិកបក្សថ្មីទាំងអស់ ត្រូវធ្វើការកៀងគរប្រមូលសមាជិកក្រុមបក្សរបស់ខ្លួន ឲ្យបានទៅបោះឆ្នោតគ្រប់ៗ ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ នាថ្ងៃទី០៥ មិថុនា ឆ្នាំ២០២២ ខាងមុខនេះ។ ឯកឧត្តមក៏បានបញ្ជាក់ជូនសមាជិកទាំងអស់ថា មានតែគណបក្សប្រជាជនកម្ពុជាទេ ដែលមិនដែលរត់ចោលប្រជាពលរដ្ឋ គឺតែងតែនៅរួមសុខរួមទុក្ខ ជាមួយប្រជាពលរដ្ឋគ្រប់កាលៈទេសៈ ៕
