នាយករដ្ឋមន្ត្រីប៉ាឡេស្ទីន លោក Mohammed Ishtaye កាលពីថ្ងៃចន្ទបានប្រាប់គណៈរដ្ឋមន្ត្រីប៉ាឡេស្ទីនថាសាលក្រមរបស់តុលាការអ៊ីស្រាអែលដែលចោទអាជ្ញាធរប៉ាឡេស្ទីន(PA)ថាជាអ្នកគាំទ្រអំពើភេរវកម្មនោះ«ត្រូវបានច្រានចោល»។
កាលពីថ្ងៃអាទិត្យ ប្រព័ន្ធផ្សព្វផ្សាយរបស់អ៊ីស្រាអែលបានរាយការណ៍ថា តុលាការកំពូល អ៊ីស្រាអែលបានកាត់ក្តីថាអាជ្ញាធរប៉ាឡេស្ទីននឹងទទួលខុសត្រូវចំពោះ«អំពើភេរវកម្ម»ដោយសារតែគោលនយោបាយដ៏ចម្រូងចម្រាសរបស់ខ្លួនក្នុងការផ្តល់ប្រាក់ឧបត្ថម្ភដល់អ្នកទោសសន្តិសុខនៅក្នុងពន្ធនាគារអ៊ីស្រាអែល និងក្រុមគ្រួសាររបស់អ្នកស្លាប់ក្នុងការវាយប្រហារលើជនជាតិអ៊ីស្រាអែល។
លោក Ishtaye បាននិយាយថា«ការគាំទ្ររបស់រដ្ឋាភិបាលសម្រាប់គ្រួសារគឺមិនគាំទ្រអំពើភេរវកម្មទេ ផ្ទុយទៅវិញ វាជាកាតព្វកិច្ចរបស់យើងចំពោះកូនៗនៃអ្នកទោស និងគ្រួសាររបស់ពួកគេដែលត្រូវការជំនួយពីយើង»។
លោកនាយករដ្ឋមន្រ្តីបានប្រាប់កិច្ចប្រជុំប្រចាំសប្តាហ៍របស់គណៈរដ្ឋមន្ត្រីដែលធ្វើឡើងនៅទីក្រុងរ៉ាម៉ាឡានៃតំបន់West Bank ថា«ការអះអាងរបស់តុលាការអ៊ីស្រាអែលគឺមិនអាចទទួលយកបាន និងខុសច្បាប់ ដោយចាត់ទុកតុលាការថាជា«ឧបករណ៍មួយក្នុងចំណោមឧបករណ៍នៃការចូលកាន់កាប់»៕
