ភ្នំពេញ ៖ ស្ត្រីម្នាក់រងរបួសធ្ងន់បែកក្បាលវង្វេងស្មារតី ត្រូវបានក្រុមសង្គ្រោះរបស់អង្គភាព៧១១ កងពលតូចលេខ៧០ ជួយអន្តរាគមន៍ភ្លាមៗ បន្ទាប់ពីជិះម៉ូតូឆ្លងផ្លូវ ត្រូវបានរថយន្តបើកបុក កាលពីវេលាម៉ោង៥និង៣០នាទីព្រឹក ថ្ងៃទី១៧ ខែមេសា ឆ្នាំ២០២២ នៅតាមផ្លូវជាតិលេខ៣ ចំណុចភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិសែនជ័យ ។
ជនរងគ្រោះឈ្មោះ ឆេង សុផា ភេទស្រី អាយុ៦៦ឆ្នាំ មុខរបរលក់គុយទាវ បាយ កាហ្វេ នៅភូមិក្រាំងដូនទៃ សង្កាត់ចោមចៅទី២ ខណ្ឌពោធិសែនជ័យ រងរបួសបែកក្បាលពីក្រោយធ្ងន់ ក្នុងសភាពវង្វេងបាត់ស្មារតី ។
តាមប្រភពនៅកន្លែងបានឲ្យដឹងថា មុនកើតហេតុ ជនរងគ្រោះជិះម៉ូតូម៉ាកស្មាស់ ពណ៌ខ្មៅ ពាក់ស្លាកលេខ កំពង់ចាម 1B-1619 គោលបំណងឆ្ពោះទៅផ្សារជម្ពូវ័ន រកទិញម្ហូប របស់របរសម្រាប់លក់ដូរ តាមផ្លូវជាតិលេខ៣ ពីត្បូងទៅជើង ដល់ចំណុចកើតហេតុ ឆ្លងផ្លូវតាមប្រឡោះសួនទ្រូងផ្លូវទៅលិច ស្រាប់តែមានរថយន្តមិនចាំម៉ាកបើកពីជើងទៅត្បូងល្បឿនលឿន បុកបណ្តាលឲ្យដួលរងរបួសធ្ងន់ រថយន្តបើកគេចទៅបាត់ ។
ក្រោយកើតហេតុជនរងគ្រោះត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ជួយអន្តរាគមន៍ដឹកបញ្ជូនទៅសង្គ្រោះនៅមន្ទីរពេទ្យព្រះកុសុមៈ ចំណែកម៉ូតូសមត្ថកិច្ចយកទៅរក្សាទុកនៅប៉ុស្តិ៍ចោមចៅទី៣ រងចាំប្រគល់ជូនវិញនៅពេលក្រោយ ៕
