អន្តរជាតិ៖ប្រធានាធិបតីអ៊ុយក្រែនលោក Volodymyr Zelenskyy បដិសេធមិនទទួលសេចក្តីព្រាងសំណើរដែលរៀបរាប់ពីលក្ខខណ្ឌបទឈប់បាញ់របស់ទីក្រុងមូស្គូ ដែលអ្នកនាំពាក្យប្រធានាធិបតីរុស្ស៊ីលោក Dmitry Peskov និយាយថា លោកបានផ្តល់ឱ្យក្រុងគៀវ។លោកZelenskyy បាននិយាយនៅក្នុងសន្និសីទសារព័ត៌មានមួយកាលពីថ្ងៃពុធបន្ទាប់ពីបានជួបជាមួយប្រធានក្រុមប្រឹក្សាអឺរ៉ុបលោក Charles Michel ក្នុងទីក្រុងគៀវ។
លោកបានថ្លែងអំណរគុណដល់សហភាពអឺរ៉ុបសម្រាប់ជំនួយយោធាដែលបានសន្យារបស់ពួកគេចំនួន 1.5 ពាន់លានអឺរ៉ូ ឬប្រហែល 1.6 ពាន់លានដុល្លារអាមេរិក ហើយបាននិយាយថាមូលនិធិទាំងនេះនឹងត្រូវបានប្រើដើម្បីផ្តល់ឱ្យអ៊ុយក្រែននូវសព្វាវុធដែលខ្លួនត្រូវការនៅពេលនេះ។ លោកបានសង្កត់ធ្ងន់ថា សព្វាវុធគួរតែត្រូវបានផ្គត់ផ្គង់មុនពេលវាយឺតពេល។
លោក Zelenskyy បានបន្តថា មានវិធីពីរយ៉ាងក្នុងការពារទីក្រុងកំពង់ផែ Mariupol ដែលត្រូវបានឡោមព័ទ្ធ។ ទីមួយគឺផ្តល់ជំនួយកាន់ច្រើនដល់យោធាអ៊ុយក្រែន និងទីពីរគឺការទូត។លោកបានកត់សម្គាល់ថា រហូតមកដល់ពេលនេះ អ៊ុយក្រែនមិនមានឧបករណ៍គ្រប់គ្រាន់ទេ ហើយរុស្ស៊ីក៏មិនទាន់ត្រៀមខ្លួនសម្រាប់ដំណោះស្រាយដោយសន្តិវិធីដែរ៕
