បន្ទាយមានជ័យ៖អាសូរណាកុមារខ្មែរម្នាក់ស្លាប់និង១១នាក់ទៀតជាពលករខ្មែរឆ្លងដែនបានហើយបែរជាជួបគ្រោះថ្នាក់ចរាចរបណ្តាលអោយស្លាប់នឹងរបួសជាមួយជនជាតិថៃជាមេខ្យល់ពីរនាក់ប្តីប្រពន្ធស្លាប់ម្នាក់ក្នុងទឹកដីថៃនៃខេត្តស្រះកែវ។
ករណីនេះបានកើតឡើងកាលពីវេលាម៉ោង ២ និង ៥៥ នាទី រំលងអធ្រាត្រថ្ងៃទី២៣ ខែមេសា ឆ្នាំ២០២២ តាមបណ្តោយផ្លូវលេខ ៣៥៩ ក្នុងភូមិ៧ ឃុំស្រះខ្វាន់ ស្រុកមឿង ខេត្តស្រះកែវ ប្រទេសថៃ រវាងរថយន្តនីសាន់ និងរថយន្តសណ្តោងធុនធ្ងន់។
យោងតាមព័ត៍មានថៃនៅកន្លែងកើតហេតុ គេសង្គេតឃើញរថយន្តនីសាន់បានបុកពីក្រោយទៅលើរថយន្តសណ្តោងធុនធ្ងន់ បណ្តាលឱ្យអ្នកបើកបរឈ្មោះ ថាំ ប្រាក់ឌិន ភេទប្រុស អាយុ ៣០ ឆ្នាំ ជាជនជាតិថៃ រងរបួសធ្ងន់ ដោយឡែកប្រពន្ធអ្នកបើកបរឈ្មោះ វិមុដា អាយុ ៣៥ ឆ្នាំ ដែលអង្គុយក្បែរ (ស្លាប់) និងកុមារាអាយុ ១ ឆ្នាំ ជាជនជាតិខ្មែរ (ស្លាប់) រីឯពលករខ្មែរដែលអង្គុយខាងក្រោយចំនួន ១១ នាក់ទៀត រងរបួសទាំងអស់ ដោយភ្លាមៗនោះ សមត្ថកិច្ចថៃបានបញ្ជូនទៅសង្គ្រោះនៅឯមន្ទីរពេទ្យ សម្តេចព្រះយុផារ៉ាត ក្នុងខេត្តស្រះកែវ។
បើតាមសេចក្តីរាយការណ៍បានបញ្ជាក់ថា រថយន្តនីសាន់នេះ បានទៅដឹកពលករខ្មែរទាំង ១២ នាក់ មកពីចំណុចព្រំប្រទល់ស្រុកអារញ្ញប្រាថេត និងស្រុកខ្លងហាត ក្បែព្រំដែនកម្ពុជា ដោយយកទៅដាក់នៅស្រុក ភ្នំសារ៉ាខាម ខេត្តឆៈឈើងសៅ ដោយសារតែការបើកលឿនទើបមានបញ្ហាបែបនេះ។
ដោយឡែកលោក ឈុន តាន អ្នកបើកបររថយន្តសណ្តោងបាននិយាយថា លោកបានទៅដឹកម្សៅដំឡូងមីមកពីខេត្តសុីសាកេត ឆ្ពោះទៅកាន់រោងចក្រ នៅខេត្តឈុនបុរី ដោយបើកយឺតៗធម្មតា ស្រាប់តែឮសំឡេងមានអ្វីបុកពីក្រោយ ទើបលោកបានឈប់ហើយចុះទៅមើល ស្រាប់តែឃើញមានរថយន្តមកបុកពីក្រោយ ព្រមទាំងមានមនុស្សស្លាប់ និងរបួសច្រើន ទើបលោករាយការណ៍ទៅសមត្ថកិច្ចតែម្តង៕
