ភ្នំពេញ៖ វ៉ាក់សាំង Pfizer ជាជំនួយរបស់សហរដ្ឋអាមេរិក ក្រោមយន្តការ COVAX ត្រូវបានដឹកមកដល់កម្ពុជាហើយ កាលពីព្រឹកថ្ងៃទី៣ ខែឧសភា ឆ្នាំ២០២២នេះ។ អង្គការ UNICEF ប្រចាំកម្ពុជាបានថ្លែងអំណរគុណដល់ស្ថានទូតអាមេរិកប្រចាំកម្ពុជា និងភ្នាក់ងារជំនួយអាមេរិក USAID ដែលបានផ្ដល់វ៉ាក់សាំងដល់កម្ពុជានេះ។
តាមរយៈគេហទំព័រហ្វេសប៊ុករបស់អង្គការ UNICEF ប្រចាំកម្ពុជា លោកស្រី ហ្វ័រូហ្គ ហ្វយូហ្សិថ (Foroogh Foyouzat) នាយិកាយូនីសេហ្វប្រចាំកម្ពុជា ក្នុងពិធីស្វាគមន៍ប្រគល់ និងទទួលវ៉ាក់សាំង Pfizer ជំនួយរបស់សហរដ្ឋអាមេរិក តាមរយៈយន្តការ COVAX កាលពីថ្ងៃម្សិលមិញនេះបានថ្លែងថា៖ «ដោយធ្វើការរួមគ្នា យើងអាចសម្រេចបាននូវលទ្ធផលជាច្រើន ប៉ុន្តែយើងមិនត្រូវបំភ្លេចនូវមេរៀនដ៏មានសារៈសំខាន់បំផុតដែលយើងបានរៀនពីជំងឺរាតត្បាតនោះគឺ គ្មានអ្នកណាម្នាក់មានសុវត្ថិភាពពិតប្រាកដរហូតដល់យើងគ្រប់គ្នាម្នាក់ៗមានសុវត្ថិភាព»។
លោកស្រីបានបន្ថែមថា៖ «ថ្ងៃនេះយើងពិតជាត្រេកអរដែលបានចូលរួមក្នុងកម្មវិធីនេះ ជាមួយនឹងក្រសួងសុខាភិបាល ស្ថានទូតអាមេរិកនៅកម្ពុជា ភ្នាក់ងារជំនួយអាមេរិក USAID និងអង្គការសុខភាពពិភពលោក ដើម្បីស្វាគមន៍ការមកដល់នូវវ៉ាក់សាំងកូវីដ១៩ Pfizerចំនួនជិត២លានដូស នៅរាជាណាចក្រកម្ពុជា»។ ស្ថានទូតអាមេរិកប្រចាំកម្ពុជាបានសរសេរនៅលើហ្វេសបុករបស់ខ្លួនថា៖ «ការបញ្ជូនមកនៃវ៉ាក់សាំងកូវីដ Pfizer ចំនួន ២លានដូស តាមរយៈគំនិតផ្តួចផ្តើមនៃយន្តការ COVAX សហរដ្ឋអាមេរិកបញ្ជាក់ជាថ្មី នូវការប្តេជ្ញាចិត្តយូរអង្វែងរបស់យើង ចំពោះសុខភាព និងសុខមាលភាពនៃប្រជាជនកម្ពុជា។
កាលណាយើងធ្វើការជាមួយគ្នា យើងអាចយកឈ្នះជំងឺកូវីដ-១៩»។ កាលពីព្រឹកម្សិលមិញនេះដែរ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងដោយដាក់បញ្ចូលសិស្សនិសិ្សតទាំងអស់នៅកម្ពុជាជាក្រុមអាទិភាពនៃយុទ្ធនាការចាក់វ៉ាក់សាំងកូវីដ-១៩ និងអនុញ្ញាតឱ្យប្រើប្រាស់វ៉ាក់សាំងដែលទទួលបានមកនេះចាក់ជូនសិស្សនិស្សិតទាំងអស់ផងដែរ៕
