មនុស្សយ៉ាងហោចណាស់១៣នាក់រងរបួសនៅក្នុងហេតុការបំផ្ទុះគ្រាប់បែកនៅក្រុងការ៉ាជីប្រទេសប៉ាគីស្ថាន

បុគ្គលិកមន្ទីរពេទ្យបាននិយាយថាមនុស្សយ៉ាងហោចណាស់១៣នាក់បានរងរបួសក្នុងហេតុការណ៍ផ្ទុះគ្រាប់បែកនៅក្នុងតំបន់ផ្សារមួយនាទីក្រុងការ៉ាជីភាគខាងត្បូងប្រទេសប៉ាគីស្ថានកាលពីយប់ថ្ងៃព្រហស្បតិ៍។

លោក Shahid Rasool នាយកផ្នែកវេជ្ជសាស្ត្រនៃមជ្ឈមណ្ឌលវេជ្ជសាស្ត្រ Jinnah Postgraduate Medical Center (JPMC) ដែលជនរងគ្រោះទាំងអស់ត្រូវបានបញ្ជូនទៅព្យាបាលបានប្រាប់ប្រព័ន្ធផ្សព្វផ្សាយថា អ្នករងរបួសជាច្រើននាក់ស្ថិតក្នុងស្ថានភាពធ្ងន់ធ្ងរ ហើយភាគច្រើននៃពួកគេបានទទួលរងរបួសបន្ទាប់ពីរងការវាយប្រហារដោយគ្រាប់បែក។

ថ្លែងទៅកាន់ប្រព័ន្ធផ្សព្វផ្សាយ ប្រធានមន្ទីព័ត៌មានខេត្ត Sindh លោក Sharjeel Inam Memon បាននិយាយថា ការស៊ើបអង្កេតមួយត្រូវបានចាប់ផ្តើមដើម្បីកំណត់ពីមូលហេតុនៃការផ្ទុះ ហើយស្ថានភាពអាសន្នត្រូវបានដាក់នៅក្នុងមន្ទីរពេទ្យទាំងអស់នៅក្នុងទីក្រុងនេះ។ទន្ទឹមនឹងគ្នានេះ នៅក្នុងការសន្ទនាជាមួយទីភ្នាក់ងារការសែត Xinhua លោក Salman Qureshi បុគ្គលិកសង្គ្រោះនៃអង្គការក្រៅរដ្ឋាភិបាល Saylani Welfare Trust បាននិយាយថាក្រុមជួយសង្គ្រោះបានបញ្ជូនអ្នករបួសចំនួន 16 នាក់ទៅកាន់ JPMC ដែលម្នាក់ក្នុងចំណោមពួកគេបានស្លាប់ដោយសាររបួសធ្ងន់ធ្ងរ។

លោកបានមានប្រសាសន៍ថា៖«ឧប្បត្តិហេតុនេះបានកើតឡើងនៅក្នុងតំបន់ដែលមានមនុស្សរស់នៅច្រើនកុះករ ហើយមានអ្នកថ្មើរជើងជាច្រើននាក់ស្ថិតនៅទីតាំងកើតហេតុនៅពេលគ្រាប់បែកបានផ្ទុះឡើង»។ការិយាល័យនាយករដ្ឋមន្ត្រីប៉ាគីស្ថានបាននិយាយនៅក្នុងសេចក្តីថ្លែងការណ៍មួយនៅព្រឹកថ្ងៃសុក្រនេះថា នាយករដ្ឋមន្ត្រីប៉ាគីស្ថាន Shahbaz Sharif បានថ្កោលទោសការបំផ្ទុះនេះ ហើយបានបញ្ជាឱ្យអភិបាលខេត្ត Sindh ផ្តល់ការព្យាបាលយ៉ាងល្អបំផុតដែលអាចធ្វើទៅបានដល់អ្នករបួស។

ទូរទស្សន៍ក្នុងស្រុក ARY News បានដកស្រង់ប្រភពពីប៉ូលិសដែលនិយាយថា គ្រឿងផ្ទុះដែលលាក់ក្នុងធុងសំរាមត្រូវបានបំផ្ទុះដោយក្រុមសកម្មប្រយុទ្ធមិនស្គាល់អត្តសញ្ញាណ នៅពេលដែលរថយន្តរបស់ឆ្មាំសមុទ្រប៉ាគីស្ថានកំពុងធ្វើដំណើរឆ្លងកាត់។
នៅក្នុងការសន្ទនាជាមួយទីភ្នាក់ងារការសែត Xinhua អ្នកនាំពាក្យឆ្មាំសមុទ្របានបញ្ជាក់ថារថយន្តរបស់ពួកគេត្រូវបានបំផ្លាញជាមួយនឹងរថយន្ត5 គ្រឿងផ្សេងទៀតនៅក្នុងការបំផ្ទុះខាងលើនេះ ប៉ុន្តែបានបដិសេធមិនធ្វើអត្ថាធិប្បាយអំពីរថយន្តផ្លូវការដែលជាគោលដៅចម្បងនៅក្នុងឧប្បត្តិហេតុនោះឡើយ៕