ដោយ រតនា
ភ្នំពេញ៖ រថយន្តចំនួនពីរគ្រឿងបុកគ្នាពេញទំហឹងត្រង់ចំណុចផ្លូវបែកជាបួនបណ្តាលឱ្យរថយន្តទទួលរងការខូចខាតយ៉ាងដំណំ។
ហេតុការណ៍នេះកើតឡើងនៅវេលាម៉ោង ១ និង ១០ នាទីយប់រំលងអាធ្រាត្រឈានចូលថ្ងៃទី ២៤ ខែឧសភា ឆ្នាំ ២០២២ ស្ថិតតាមបណ្ដោយផ្លូវ ៣៦០ កែងនឹងផ្លូវ១៣៣ ក្នុងសង្កាត់ បឹងកេងកង ទី ៣ ខណ្ឌ បឹងកេងកង រាជ ធានី ភ្នំ ពេញ ។
តាមប្រភពព័ត៌មានពីកន្លែងកើតហេតុបានបញ្ជាក់ដោយក្រុមការងារបានដឹងថានៅមុនពេលកើតហេតុគេបានឃើញរថយន្តមួយគ្រឿង ម៉ាក KIA ពណ៌ក្រហម ពាក់ស្លាកលេខ ភ្នំពេញ 2AS-2061 បើកបរដោយបុរសនិងនារីចំនួន ២នាក់ បានធ្វើដំណើរតាមបណ្ដោយផ្លូវ៣៦០ ក្នុងទិសដៅពីលិចទៅកើត លុះពេលធ្វើដំណើរមកដល់ត្រង់ចំណុចកើតហេតុផ្លូវបំបែកជាបួនកែងនឹងផ្លូវ ១៣៣ ក៏មានរថយន្ត ម៉ាកឡង់គ្រីស័រ ពណ៌ខ្មៅ ពាក់ស្លាកលេខ ភ្នំពេញ 2D-8181 បើកបរដោយបុរសម្នាក់ដែលបានធ្វើដំណើរតាមបណ្ដោយផ្លូវ ១៣៣ ក្នុងទិសដៅពីជើងទៅត្បូង ខណៈពេលនោះ រថយន្តទាំងពីរក៏បានបុកគ្នាពេញ បណ្ដាលឲ្យរថយន្តម៉ាក KIA រងការខូចខាតចំផ្នែកខាងមុខជំហៀង ខាងឆ្វេងយ៉ាងដំណំ។ រីឯរថយន្ត ឡង់គ្រីស័រ ខូចខាត ចំផ្នែក ខាង ស្ដាំ យ៉ាង ដំណំ ផងដែរ ។
ក្រោយពេលកើតហេតុសមត្ថកិច្ចជំនាញផ្នែកចរាចរណ៍បានធ្វើការវាស់វែង និងបានយករថយន្តភាគីទាំងសងខាង ទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយនៅពេលក្រោយបន្តទៀតផងដែរ៕
