លោក Jose Mourinho អ្នកចាត់ការក្រុម Roma បាននិយាយក្រោយឈ្នះពាន Europa Conference League ថា លោកនឹងបន្តដឹកនាំក្លិបអ៊ីតាលីនេះដដែលទោះជាមានក្លិបណាផ្សេងដាក់សំណើចង់បានក៏ដោយ។កាលពីពេលកន្លងទៅនេះ Mourinho ត្រូវបានគេរាយការណ៍ថា មានក្លិបមួយចំនួនទាក់ទងចង់បានរូបលោកសម្រាប់រដូវកាលខាងមុខ ដែលក្លិបទាំងនោះក៏មានអតីតក្រុមមួយចំនួនដែលលោកធ្លាប់ដឹកនាំផងដែរ។
លោក Mourinho បាននិយាយថា៖«យើងបង្កើតប្រវត្តិសាស្ត្រនៅទីនេះក្នុងថ្ងៃនេះ ឥឡូវមានរឿងជាច្រើនដែលខ្ញុំត្រូវធ្វើ។ ខ្ញុំមានការគោរពដ៏ខ្ពង់ខ្ពស់បំផុតទៅដល់ក្លិបទាំងអស់ដែលខ្ញុំធ្លាប់ដឹកនាំ ប៉ុន្តែពេលនេះ ខ្ញុំជាគ្រូបង្វឹក Roma ហើយព្រោះអ្នកគាំទ្រនៅទីនេះពិតជាអស្ចារ្យមែនទែន»។លោកបានបន្តថា៖«ខ្ញុំនឹងបន្តនៅ Roma គ្មានអ្វីត្រូវសង្ស័យនោះទេ ទោះមានក្លិបណាដាក់សំណើក៏ខ្ញុំនៅតែចង់បន្តនៅទីនេះទៀតដដែល »។
គូសបញ្ជាក់ថានេះជាលើកទី១ហើយសម្រាប់ Roma ដែលបានឈ្នះពាន Europa Conference League ខណៈនេះជាលើកទី៥របស់លោក Mourinho ហើយដែលឈ្នះពានអឺរ៉ុប ដោយឈ្នះពាន Champions League ២ដង Europa League ២ដង និង ពានចុងក្រោយConference League នេះ៕
