ឃាត់ខ្លួនជនសង្ស័យម្នាក់ ពាក់ព័ន្ធករណីប្លន់ម៉ូតូបានសម្រេច

ដោយ រតនា

ភ្នំពេញ: ជនសង្ស័យម្នាក់ ចំណោមបក្សពួក ០២នាក់ត្រូវបានសមត្ថកិច្ចប៉ុស្តិ៍ច្បារអំពៅ២ ឃាត់ខ្លួន ដែលបានធ្វើសកម្មភាព ប្រើកូនកាំបិតភ្ជង់គំរាមប្លន់យកម៉ូតូ បានសម្រេច។ហេតុការណ៍នេះកើតឡើងកាលពីវេលាម៉ោង ០១និង៣០នាទីរសៀល ថ្ងៃទី៣១ ខែឧសភា ឆ្នាំ២០២២ ចំណុចមុខផ្ទះគ្មានលេខ ក្នុងភូមិដើមចាន់ សង្កាត់ច្បារ អំពៅ២ ខណ្ឌច្បារអំពៅ។

សមត្ថកិច្ចបានឲ្យដឹងថាជនសង្ស័យឈ្មោះ អ៊ុក ណាយ៉ិន ភេទ ប្រុស អាយុ ៣១ឆ្នាំ ជនជាតិ ខ្មែរ មុខរបរ មិនពិតប្រាកដ ស្នាក់នៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ។

ចំណែកជនរងគ្រោះមានឈ្មោះ មូល សំបូរ ភេទ ប្រុស អាយុ ២៥ឆ្នាំ ជនជាតិ ខ្មែរ មុខរបរ កម្មករស្ងោរសណ្តែកដី ស្នាក់នៅផ្ទះលេខ១៩០ ផ្លូវ ៣៦៩ ភូមិកណ្តាល សង្កាត់ច្បារអំពៅ២ ខណ្ឌច្បារអំពៅ។

លោកវរសេនីយ៍ត្រី អ៊ុ រតនា នាយប៉ុស្តិ៍នគរបាលរដ្ឋបាលច្បារអំពៅ២ បានឱ្យដឹងនៅរសៀលថ្ងៃទី៣១ ខែឧសភា នេះថា ដោយមានការចង្អុលបង្ហាញពីលោកវរសេនីយ៍ឯក ម៉ៅ សឿត អធិការនគរបាលខណ្ឌច្បារអំពៅ ដឹកនាំកម្លាំងដោយ លោក វរសេនីយ៍ទៅ គាន់ ឌីណា អធិការងទទួលផែនការងារព្រហ្មទណ្ឌខណ្ឌ និង កម្លាំងសមត្ថកិច្ចប៉ុស្តិ៍ច្បារអំពៅ២ បានស្រាវជ្រាវចុះឃាត់ជនសង្ស័យម្នាក់ចំណោមបក្សពួក ០២នាក់ ដែលបានប្រើកូនកាំបិតភ្ជង់គំរាមប្លន់យកម៉ូតូ Scoopyi មួយគ្រឿងបានសម្រេច កាលពីថ្ងៃទី២៧ ខែឧសភា ឆ្នាំ២០២២នេះ។

លោកបានបញ្ជាក់ផងដែរថា នៅថ្ងៃកើតហេតុជនរងគ្រោះបានជិះម៉ូតូមួយគ្រឿង ម៉ាក Honda Scoopy ស៊េរីឆ្នាំ 2022 ពណ៌ខៀវ ពាក់ស្លាកលេខ ភ្នំពេញ 1IX-8878 មកឈប់នៅចំណុចកើតហេតុ បានបន្តិចក៏ស្រាប់តែមានជនសង្ស័យ ០២នាក់ ឈ្មោះ អ៊ុក ណាយ៉ិន និងឈ្មោះ ភា បានដើរមកធ្វើសកម្មភាព យកកូនកាំបិតចុង ស្រួចធ្វើសកម្មភាពភ្ជង់គំរាមប្លន់ យកម៉ូតូជនរងគ្រោះខាងលើបានសម្រេចជិះគេចខ្លួន និង បានយកកូនកាំបិតបោះចោលបាត់ បន្ទាប់មក ជនសង្ស័យឈ្មោះ ភា ក៏ជិះម៉ូតូជនរងគ្រោះទៅលក់ឲ្យគេបាត់នៅម្តុំឃ្លាំងរំសេវ។ ចំណែកជនសង្ស័យឈ្មោះ ភា ដែលគេចខ្លួន សមត្ថកិច្ចយើងនិង ស្រាវជ្រាវរហូតឈានដល់ឃាត់ខ្លួនយកមកផន្ទាទោសតាមច្បាប់។

ក្រោយពេលកើតហេតជនសង្ស័យត្រូវបានកម្លាំងសមត្ថកិច្ចឃាត់ខ្លួនយកមកប៉ុស្តិ៍ សួរនាំនិងកសាងសំណុំរឿងបញ្ជូនទៅអធិការនគរបាលខណ្ឌច្បារអំពៅដើម្បីចាត់ការបន្តតាមនីតិវិធី៕