កំពង់ឆ្នាំង: នៅម៉ោងប្រហែល១១ ព្រឹកថ្ងៃទី០១ ខែមិថុនា ឆ្នាំ២០២២នេះ ដឹកនាំដោយវរសេនីយ៍ឯក ហ៊ុល វាសនា ស្នងការរង សហការជាមួយអធិការដ្ឋាននគរបាលស្រុកកំពង់ត្រឡាច និងស្រុករលាប្អៀរ ក្រោមបទបញ្ជារបស់ឧត្តមសេនីយ៍ទោ ខូវ លី ស្នងការនគរបាលខេត្ត បញ្ជាយ៉ាងម៉ឺងម៉ាត់ មិនឲ្យរថយន្តជនល្មើសពាក់ព័ន្ធនឹងគ្រឿងញៀនមួយនេះរួចខ្លួនជាដាច់ខាត ដោយមានការសម្របសម្រួលនីតិវិធី ពីឯកឧត្តម អ៉ិត សុធា ព្រះរាជអាជ្ញាខេត្តកំពង់ឆ្នាំង។
សមត្ថកិច្ចបានឡោមព័ទ្ធ ចាប់យុវជនម្នាក់ ពាក់ព័ន្ធគ្រឿងញៀនតាមផ្លូវជាតិលេខ ៥ ចំណុចគល់ស្ពានជ្រលងម៉ៅ ក្នុងស្រុកកំពង់ត្រឡាច ខេត្តកំពង់ឆ្នាំង មានឈ្មោះ កុយ ណារិទ្ធ ហៅរស់ អាយុ ៣១ ឆ្នាំ រស់នៅភូមិព្រៃពួច ឃុំជ្រៃបាក់ ស្រុករលាប្អៀរ ជាមុខសញ្ញាទើបនិងចេញពីមណ្ឌលអប់រំកែប្រែ សមត្ថកិច្ចបានដកហូតថ្នាំញៀនប្រភេទម៉ាទឹកកក ចំនួន ៣៧កញ្ចប់ មានទម្ងន់ ៧១.៣៥ក្រាម។
ដើមហេតុយុវជននេះ បានបើករថយន្តទៅលេងទំនប់បឹងឈ្វាំង ក្នុងភូមិព្រៃខ្មែរ សមត្ថកិច្ចមានការសង្ស័យបានឃាត់សាកសួរ ប៉ុន្តែជននោះបានបើករថយន្តបំបុកសមត្ថកិច្ចដើម្បីគេចខ្លួន ធ្វើដំណើរទៅកាន់ផ្លូវជាតិលេខ ៥វិញ សមត្ថកិច្ចបានដាក់បារ៉ាស់តាមផ្លូវចំនួន ៣កន្លែង ប៉ុន្តែដាក់មិនជាប់ ដោយបំបុកបារ៉ាស់ រហូតដល់គោលដៅចុងក្រោយ ក្នុងស្រុកកំពង់ត្រឡាច សមត្ថកិច្ចបានយករថយន្តធំដឹកដី ដាក់ពាំងកណ្តាលផ្លូវជាតិលេខ៥ ទើបអាចឃាត់ចាប់រថយន្តនោះបាន។
