រដ្ឋាភិបាលរបស់នាយករដ្ឋមន្ត្រីប៉ាគីស្ថាន Shehbaz Sharif បានបញ្ជូនជំនួយមនុស្សធម៌ដល់អ៊ុយក្រែន ដោយបង្ហាញពីភាពផ្ទុយគ្នាជាមួយនឹងជំហរគាំទ្ររុស្ស៊ីរបស់អតីតនាយករដ្ឋមន្រ្តីImran Khan។
បើយោងតាមសារព័ត៌មានNHK ជំនួយសង្គ្រោះប្រហែល 7.5 តោនដែលរួមមានទាំងភួយ និងថ្នាំពេទ្យដែរនោះ ត្រូវបានដឹកជញ្ជូនតាមយន្ដហោះមួយគ្រឿងនៅឯមូលដ្ឋានទ័ពអាកាសក្នុងទីក្រុង Rawalpindi ក្បែររដ្ឋធានី Islamabad កាលពីថ្ងៃព្រហស្បតិ៍។យន្តហោះនេះគ្រោងនឹងចុះចតនៅក្នុងប្រទេសប៉ូឡូញ ដែលជាអ្នកជិតខាងរបស់អ៊ុយក្រែននៅថ្ងៃសុក្រនេះ។
ឯកអគ្គរដ្ឋទូតអ៊ុយក្រែនប្រចាំប្រទេសប៉ាគីស្ថាន លោក Markian Chuchuk បានសម្តែងការដឹងគុណចំពោះ “ឈរជាមួយអ៊ុយក្រែន”របស់ប៉ាគីស្ថាន។ លោកបាននិយាយថាអ៊ុយក្រែនចាត់ទុកជំនួយនេះជាការបង្ហាញពីសុច្ឆន្ទៈ ភាពជាដៃគូ និងការអាណិតអាសូរចំពោះប្រជាជនអ៊ុយក្រែន។
រដ្ឋមន្ត្រីការបរទេសប៉ាគីស្ថាន Hina Rabbani Khar បាននិយាយថា ប្រទេសនេះគាំទ្ររាល់កិច្ចខិតខំប្រឹងប្រែងដើម្បីផ្តល់ជំនួយមនុស្សធម៌ដល់ជនស៊ីវិលនៅក្នុងតំបន់ដែលរងផលប៉ះពាល់។លោកSharif បានចាប់ផ្តើមរដ្ឋាភិបាលរបស់លោកនៅក្នុងខែមេសា។ គោលនយោបាយរបស់គាត់ក្នុងការគាំទ្រអ៊ុយក្រែនគឺផ្ទុយស្រឡះទៅនឹងជំហរគាំទ្ររុស្ស៊ីរបស់អតីតនាយករដ្ឋមន្ត្រី Imran Khan។
អតីតនាយករដ្ឋមន្រ្តីKhan បានជួបជាមួយប្រធានាធិបតីរុស្ស៊ីលោក Vladimir Putin នាទីក្រុងមូស្គូនៅថ្ងៃទី 24 ខែកុម្ភៈនៅថ្ងៃតែមួយដែលរុស្ស៊ីបានបើកការឈ្លានពាន។ប្រទេសប៉ាគីស្ថានក៏បានបដិសេធមិនបោះឆ្នោតផងដែរលើសេចក្តីព្រាងដំណោះស្រាយថ្កោលទោសរុស្ស៊ីនៅឯសម័យប្រជុំបន្ទាន់នៃមហាសន្និបាតអង្គការសហប្រជាជាតិក្នុងខែមីនា៕
