ឡើងវ៉ាជែងមិនផុតជ្រុលបុករថយន្តនៅខាងមុខបណ្តាលអោយខូចខាតយ៉ាងដំណំ

ខេត្តបាត់ដំបង! រថយន្តធុនធំមួយគ្រឿងបើកបរក្នុងល្បឿនលឿនឡើងវ៉ាជែងមិនផុតបានជ្រុលទៅបុករថយន្តខាងមុខពេញទំហឹងបណ្តាលឲ្យខូចខាតយ៉ាងដំណំ។

សមត្ថកិច្ចបានឲ្យដឹងថា÷ ករណីគ្រោះថ្នាក់ចរាចរណ៍ខាងលើនេះបានកើតឡើងនៅវេលាម៉ោង ៨និង៤៥នាទីព្រឹក ថ្ងៃទី០៦ ខែមិថុនា ឆ្នាំ២០២២ នៅលើកំណាត់ផ្លូវជាតិលេខ៥ ត្រង់ចំណុចក្រុមទី០៣ ស្ថិតក្នុងភូមិវាលទ្រា ឃុំអូរតាគី ស្រុកថ្មគោល ខេត្តបាត់ដំបង។

ប្រភពនៅកន្លែងកើតហេតុបានអោយដឹងថា នៅមុនពេលកើតហេតុគេឃើញរថយន្តធុនធ្ងន់ម៉ាក MITSUBISHI ពណ៍ស មួយគ្រឿង ពាក់ផ្លាកលេខបាត់ដំបង ៣A-៤៤៦២ បើកបរដោយឈ្មោះ ផុន វណ្ណដេត ភេទប្រុស អាយុ២១ឆ្នាំ មានទីលំនៅភូមិព្រែកហ្លួង ឃុំស្តីលើ ស្រុកឯកភ្នំ ខេត្តបាត់ដំបង បានបើកបរក្នុងល្បឿនយ៉ាងលឿនក្នុងទិសដៅពីត្បូងទៅជើង លុះមកដល់ចំណុចកើតហេតុបានឡើងវ៉ាជែងមិនផុតក៏ជ្រុលទៅបុករថយន្តដឹកពូកម៉ាក SANG YONG ពណ៌លឿង ពាក់ផ្លាកលេខភ្នំពេញ ២W-៧៦៤៤ បើកបរដោយឈ្មោះ ម៉ាប់ មាស ភេទប្រុស អាយុ២១ឆ្នាំ មានទីលំនៅភូមិគោករកា ឃុំព្រាល ស្រុកកញ្ជៀច ខេត្តព្រៃវែង ដែលបើកបរខាងមុខពេញទំហឹងបណ្តាលឲ្យផ្ទប់កៀបជាប់ទៅនឹងរនាំងពុះទ្រូងផ្លូវអូសជាច្រើនម៉ែត្រអោយខូចខាតយ៉ាងដំណំ ចំណែកអ្នកបើកបរទាំងសងខាងរងរបួសស្រាល។

ក្រោយពេលកើតហេតុសមត្ថកិច្ចការិយាល័យនគរបាលចរាចរណ៍ផ្លូវគោកខេត្តបាត់ដំបង បានចុះទៅវាស់វែងនិងស្ទូចយករថយន្តទាំងពីរគ្រឿងមករក្សាទុកដើម្បីចាត់ការតាមនីតិវិធីច្បាប់៕