បើករថយន្តលឿនដូចហោះ វ៉ាជែងមិនប្រយ័ត្នបុកគ្នាពេញទំហឹង

ដោយ រតនា

ភ្នំពេញ៖ ករណីគ្រោះថ្នាក់ចរាចរណ៍ មួយបានកើតឡើងនៃដោយរថយន្ដចំនួន ២ គ្រឿងបុកគ្នាពេញទំហឹងបណ្ដាលឲ្យរថយន្តភាគីទាំងសងខាងខ្ទិចស្ទើរតែទាំងស្រុង និងបណ្ដាលឲ្យមានមនុស្សរងរបួស។

ហេតុការណ៍មួយនេះបានកើតឡើងនៅវេលាម៉ោង ១២ និង ៣០ នាទីយប់រំលងអាធ្រាត្រឈានចូលថ្ងៃទី ១០ ខែមិថុនា ឆ្នាំ ២០២២ តាមបណ្ដោយផ្លូវជាតិលេខ ១ ក្នុងសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានបញ្ជាក់ក្រុមការងារឲ្យបានដឹងថា៖ នៅមុនពេលកើតហេតុ គេបានឃើញ រថយន្តស៊េរីទំនើបមួយគ្រឿង ម៉ាក Santafe ពណ៌ស ពាក់ស្លាកលេខ កម្ពុជា NOV-RINA បើកបរដោយបុរសម្នាក់ធ្វើដំណើរតាមបណ្តោយផ្លូវជាតិលេខ ១ ក្នុងទិសដៅពីលិចទៅកើត។លុះពេលធ្វើដំណើរបត់ត្រង់ចំណុចកើតហេតុខាងលើស្រាប់តែមានរថយន្តប្រភេទសណ្ដោងកុងតឺន័រមួយគ្រឿង ពាក់ស្លាកលេខ ភ្នំពេញ 3C-5193 បានធ្វើដំណើរតាមបណ្ដោយផ្លូវជាតិលេខ ១ កក្នុងទិសដៅពីកើតទៅលិច។ ខណៈពេល នោះ រថយន្តទាំងពីរក៏បានបុកគ្នាចំពីមុខពេញទំហឹងបណ្ដាលឲ្យ រថយន្តស៊េរីទំនើបម៉ាក Santafe រងការខូចខាតចំផ្នែកខាងមុខយ៉ាងដំណំ និងបង្កឲ្យបុរសជាអ្នកបើកបររងរបួសធ្ងន់ធ្ងរត្រូវបានរថយន្តសាមុយ គ្លីនិកឯកជន ដឹកបញ្ជូនទៅសង្គ្រោះបន្ទាន់ភ្លាមៗបន្ទាប់ពីកើតហេតុ។ ចំណែកឯរថយន្តសណ្ដោងកុងតឺន័រ វិញទទួលរងការខូចខាតចំផ្នែកខាងមុខ ខ្ទិចស្ទើរតែទាំងស្រុងតែ ម្តង។

ក្រោយពេលកើតហេតុសមត្ថកិច្ចជំនាញចរាចរណ៍បានធ្វើការវាស់វែង រួចបានយករថយន្តទាំង២ ទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយគ្នានៅពេលក្រោយបន្តទៀតផងដែរ៕