នាយករដ្ឋមន្ត្រីអូស្ត្រាលីនឹងចូលរួមកិច្ចប្រជុំកំពូលរបស់អង្គការណាតូ

នាយករដ្ឋមន្ត្រីអូស្ត្រាលី លោក Anthony Albanese នៅថ្ងៃសុក្រនេះ បាននិយាយថា លោកនឹងចូលរួមកិច្ចប្រជុំ “សំខាន់” របស់អង្គការណាតូ នៅទីក្រុងម៉ាឌ្រីដ នៅចុងខែនេះ ខណៈដែលអង្គការនេះកំពុងសម្លឹងមើលការពង្រឹងទំនាក់ទំនងរបស់ខ្លួនបន្ថែមទៀត បន្ទាប់ពីសង្គ្រាមរុស្ស៊ីនៅអ៊ុយក្រែន។

អូស្ត្រាលី ដែលជាអ្នករួមចំណែកដ៏ធំបំផុតមួយក្នុងការជួយជ្រោមជ្រែងអ៊ុយក្រែននិងមិនមែនជាសមាជិកអង្គការណាតូ បាននិងកំពុងផ្គត់ផ្គង់ជំនួយនិងឧបករណ៍ការពារ ហើយបានហាមឃាត់ការនាំចេញអាលុយមីញ៉ូម និងរ៉ែអាលុយមីញ៉ូម រួមទាំងសារធាតុបុកស៊ីត ទៅកាន់ប្រទេសរុស្ស៊ី។

លោក Albanese បាននិយាយកាលពីថ្ងៃសុក្រថា៖ “ខ្ញុំនឹងទៅអង្គការណាតូ ដែលនេះជាអាទិភាពដើម្បីគាំទ្រប្រជាជនអ៊ុយក្រែន ក្រោកឈរឡើងប្រឆាំងនឹងអាកប្បកិរិយាខុសច្បាប់ដ៏ឃោរឃៅរបស់រុស្ស៊ី”។នៅឯកិច្ចប្រជុំកំពូលថ្ងៃទី២៩-៣០ ខែមិថុនា នៅទីក្រុងម៉ាឌ្រីដ មេដឹកនាំណាតូនឹងពិភាក្សាអំពីកំណែទម្រង់រយៈពេលវែងនៃសម្ព័ន្ធភាព ទោះបីជាមានភាពខុសប្លែកគ្នាអំពីចំនួនកងទ័ព និងទីតាំងក៏ដោយ។ បន្ទាប់ពីការឈ្លានពានរបស់រុស្ស៊ីលើអ៊ុយក្រែនកាលពីថ្ងៃទី២៤ ខែកុម្ភៈកន្លងទៅ ណាតូបានបង្កើនវត្តមានរបស់ខ្លួននៅក្នុងតំបន់បាល់ទិក។លោក Anthony Albanese ដែលទើបចូលកាន់តំណែងជានាយករដ្ឋមន្ត្រីអូស្ត្រាលីក្នុងពេលថ្មីៗនេះ បានបដិសេធមិនបញ្ជាក់របាយការណ៍ដែលថា លោកបានទទួលការអញ្ជើញពីប្រធានាធិបតីអ៊ុយក្រែន លោក Volodymyr Zelenskiy ឱ្យទៅធ្វើទស្សនកិច្ចនៅទីក្រុងគៀវ។

របាយការណ៍មួយនៅក្នុងកាសែត Sydney Morning Herald បានបញ្ជាក់ថា លោក Zelenskiy បានបញ្ចូលការអញ្ជើញនៅក្នុងលិខិតមួយទៅកាន់លោក Albanese ដើម្បីអបអរសាទរចំពោះជ័យជម្នះលើការបោះឆ្នោត។
ប្រទេសរុស្ស៊ីកាលពីថ្ងៃព្រហស្បតិ៍បានហាមឃាត់ពលរដ្ឋអូស្ត្រាលីចំនួន ១២១ នាក់មិនឱ្យចូលទៅក្នុងប្រទេសនេះដោយចោទប្រកាន់ពួកគេថាជាផ្នែកមួយនៃ “និន្នាការស្អប់រុស្ស៊ី”។ អូស្ត្រាលីបានដាក់ទណ្ឌកម្មលើបុគ្គល និងអង្គភាពរុស្ស៊ីរាប់រយនាក់/កន្លែង៕