អាវុធហត្ថខេត្តបន្ទាយមានជ័យបញ្ជូនស្ត្រីមេក្លោងជួញដូរគ្រឿងញៀន២នាក់ទៅតុលាការ ក្រោយរកឃើញវត្ថុតាងគ្រឿងញៀនច្រើនថង់

បន្ទាយមានជ័យ៖ កម្លាំងអាវុធហត្ថខេត្តបន្ទាយមានជ័យបានបញ្ជូនស្ត្រីពីរនាក់ទៅតុលាការនៅថ្ងៃទី២០ខែមិថុនាឆ្នាំ២០២២ បន្ទាប់ពីរកឃើញគ្រឿងញៀនច្រើនកញ្ចប់លាក់ទុកដើម្បីចែកចាយនិងជួញដូរដោយខុសច្បាប់។

លោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណបានប្រាប់អ្នកយកព័ត៌មានយើងថា កម្លាំងអាវុធហត្ថក្រុងតែងតែធ្វើការល្បាតការពារសន្តិសុខនៅក្នុងភូមិសាស្ត្រក្រុងសិរីសោភ័ណជារៀងយប់។នៅយប់ថ្ងៃទី១៩ខែមិថុនាឆ្នាំ២០២២ម៉ោងប្រមាណជា២០និង៣០នាទីយប់កម្លាំងល្បាតបានប្រទះឃើញស្ត្រីម្នាក់បានដើរម្នាក់ឯងមកអង្គុយនៅទីងងឹតចំណុចខាងកើតសួនមានជ័យ(វេទិការខេត្ត) ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ហើយមានកាយវិកាដូចជារងចាំនរណាម្នាក់និងភិតភ័យ។ដោយមានសង្ស័យ កម្លាំងល្បាតរបស់អាវុធហត្ថក៏សម្រេចសាកសួរ ពេលនោះស្ត្រីសង្ស័យក៏បានក្រវាត់កញ្ចប់ថ្នាំញៀនមួយកញ្ចប់ចោលបំរុងរត់គេចតែត្រូវសមត្ថកិច្ចឃាត់ខ្លួនជាប់បញ្ជូនមកសាកសួរនៅទីបញ្ជាមូលដ្ឋានក្រុង។

លោកវរសេនីយ៍ត្រី យ៉ាន់ សុវណ្ណ បានឱ្យដឹងថាស្រ្តី ដែលឃាត់ខ្លួនបានជាមួយនឹងគ្រឿងញៀន០១កូនថង់កិបនោះ￸មានឈ្មោះ￸ ស៊ឹម ច្រឹប អាយុ៤៤ឆ្នាំ ជនជាតិខ្មែរ បច្ចុប្បន្ន រស់នៅភូមិផាស៊ីស្រា ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។ ក្រោយសួរនាំ ស្តី្ររូបនេះបានសារភាពថាគ្រឿងញៀន០១កូនថង់កិបនេះ￸គឺគាត់បានយកពីផ្ទះស្ត្រីចំណាស់ម្នាក់ឈ្មោះ ស៊ូ សៀង អាយុ៧២ឆ្នាំរស់នៅភូមិសែសិន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។ ក្រោយទទួលបានចម្លើយនេះ កម្លាំងមូលដ្ឋានកងរាជអាវុធហត្ថក្រុងបានបើកប្រតិបត្តិការចុះឆែកឆេរផ្ទះស្ត្រីចំណាស់ដែលសង្ស័យនោះភ្លាមៗ ហើយបានរកឃើញវត្ថុតាងជាថ្នាំញៀនជាច្រើនកញ្ចប់ដោយក្នុងនោះរកឃើញគ្រឿងញៀនម៉្សៅក្រាមពណ៌សថ្លាចំនួន៥៣កូនថង់កិប មាន៣០កូនថង់កិបរុំស្គុតខ្មៅ និងគ្រឿងញៀនគ្រាប់ពណ៌ក្រហម(WY)ចំនួន០២គ្រាប់នៅក្នុងប្រអប់ដាក់ជើងធូប រួមនិងថង់សម្រាប់ច្រកគ្រឿងញៀនមួយចំនួន ទៀត។

ថ្លែងប្រាប់អ្នកយកព័ត៌មានយើង លោកវរសេនីយ៍ឯក ជា តារា មេបញ្ជាការរងកងរាជអាវុធហត្ថខេត្ត ទទួលការងារប្រឆាំងគ្រឿងញៀនបានបញ្ជាក់ឱ្យដឹងថាបច្ចុប្បន្នស្ត្រីជាជនសង្ស័យក្នុងករណីជួញដូរគ្រឿងញៀនក្នុងមូលក្រុងសិរីសោភ័ណត្រូវបានបញ្ជូនទៅតុលាការរួចហើយនៅថ្ងៃនេះ ហើយអយ្យការក៏បានសម្រេចឃុំខ្លួនរួចហើយដែរ។